Valdeorras pide axudas para competir co Bierzo en oferta de chan industrial

O metro cadrado no Barco é máis caro que no Bayo, Bembibre ou Toral

F.L. / Ponferrada
A oferta de chan industrial no Bierzo é moito máis competitiva que a da veciña comarca de Valdeorras,  o que motivou a protesta dos empresarios valdeorreses ante a Xunta de Galicia, á que acusan de pasividade e á que piden que habilite as liñas de axuda necesarias para que se produza un abaratamento no chan industrial desta comarca ourensá co fin de que non perda continuamente competitividade co Bierzo, o que leva a fuga de empresas aos polígonos de Bembibre, do Bayo, de Camponaraya e da Rozada, segundo publica hoxe o diario A Rexión.
Os empresarios que pretenden instalarse no parque empresarial da Raña, no Barco de Valdeorras, deben abonar 70 euros por metro cadrado, mentres que por ese mesmo metro cadrado págase no polígono industrial do Bierzo Alto, en San Román de Bembibre, a 60 euros por metro cadrado.
No polígono de Camponaraya, outra das grandes áreas industriais de expansión no Bierzo, o metro cadrado das últimas parcelas vendidas pagouse a 50 euros, cifra que se rebaixa a 40 euros o metro cadrado nas parcelas do macropolígono do Bayo, que desenvolven conxuntamente os concellos de Cubillos del Sil e de Ponferrada.
Por último, o prezo do metro cadrado no polígono da Rozada, en Toral dos Vaos oscila entre 12 e 15 euros.
Para o presidente da asociación de Empresarios de Valdeorras, Javier Rodríguez Paradelo, estas diferenzas de prezo son enormes: "Coa diferenza de prezo que existe constrúese parte dunha nave", asegura, e manifesta tallante: "Teñen que abaratar o chan. A diferenza é brutal", algo que está a constituír un lastre, tendo en conta de que Valdeorras é unha das comarcas produtora e exportadora de lousa máis importante do mundo, cunha denominación de orixe de viño propia e unha activa produción industrial que está a sufrir pola competencia dos polígonos bercianos, que, en xeral gozan de subvencións máis ou menos cuantiosas correspondentes aos fondos Miner dos que carece Valdeorras.
Nese sentido, os empresarios piden unha liña de axudas que permita a Valdeorras competir en igualdade co Bierzo en materia de chan industrial, algo ao que se comprometeu no seu día a Xunta, pero que ata o de agora non levou a cabo: "Somos a zona máis industrial da provincia e canto máis tempo tardemos máis van perder a provincia e Galicia", sinala Javier Rodríguez.

A Crónica de León .- 16/10/2010